O Thesis Saxophone Quartet estará este 1 de outubro en Rianxo (V Ciclo de Novos Intérpretes)

O quinto Ciclo de Novos Intérpretes que impulsa o Concello de Rianxo abre o programa de actividades o vindeiro 1 de outubro ás 12.30 horas, na Sala Arcos Moldes do Auditorio, cun concerto da agrupación galega Thesis Saxophone Quartet.

A agrupación ten a súa orixe en 2013 cando do seo da aula de saxofón do Conservatori Superior de lles Illes Balears nace baixo o nome de Thesis Quartet unha nova formación camerística integrada por catro saxofonistas cuxas expectativas están orientadas cara a un só obxectivo: achegar ao público as máis variadas sonoridades desta rica e completa formación, o cuarteto de saxofóns.

Desde a súa creación, os seus integrantes non cesaron de investigar e involucrarse en repertorios de distintas épocas, desde a música Barroca ata a música de efectos do século XXI.

A pesar de ser unha formación recente, Thesis Quartet xa actuou en diversos puntos da xeografía española tales como Galicia, Madrid ou Palma de Mallorca.

Entre os seus galardóns salientan a Mención de Honra recibida no III Concurso Internacional de Cámara Antón Garcia Abril e o segundo premio no XVI Concurs Internacional de Música de Cambra, Ciutat de Vinaròs.