O Rotogal Boiro Voleibol perde a final da Copa Galicia contra o San Sadurniño nun duelo moi igualado


O San Sadurniño proclamouse campión da Copa Galicia despois de superar na final disputada esta tarde en Pontevedra ao Rotogal Boiro Voleibol (3-2). O encontro desenvolveuse baixo unha gran igualdade, pero o acerto ofensivo dos de Ferrolterra nos tramos decisivos dalgúns sets resultou determinante no desenlace.
O San Sadurniño anotouse o primeiro set con relativa comodidade (25-19). A pesar de que o Rotogal Boiro Voleibol chegou a tomar a dianteira, foi vítima dos erros e colocouse a remolque no marcador.
Con todo, os de Emilio Palacio foron mellorando co paso dos minutos. Mario Iglesias non acusou a lesión que lle mantivo afastado das canchas durante case dúas semanas e os da Cachada equilibraron o duelo na segunda manga.
O guion repetiuse posteriormente, co terceiro parcial a favor do San Sadurniño (28-26) e o cuarto para o Rotogal Boiro Voleibol (22-25). Os da Cachada ofreceron bos momentos en facetas como o saque e a defensa, pero os de Ferrolterra tamén dominaron o duelo noutras fases.
Na morte súbita, os de Emilio Palacio acusaron a fatiga e a carga de adestramento e acabaron cedendo #ante un San Sadurniño que se mostrou fino en ataque (15-11).
Vitoria #ante Vigo en semifinais
O Rotogal Boiro Voleibol accedeu á final tras superar ao Vigo por 3-1 en semifinais. Os da Cachada realizaron unha frouxa posta en escena que lles levou a ceder a primeira manga. Pero, posteriormente, refixéronse e remontaron para facerse co partido.