O Festivalo 22 trae ao Valo de Manselle (Dodro) a Ruxe Ruxe e ao grupo revelación local Pecha a Cansela

O Concello de Dodro a través da Concellería de Cultura e Patrimonio organiza o Festivalo 22, que se vai celebrar no Valo de Manselle na aldea do mesmo nome e onde se poderá desfrutar da mellor música galega actual e de xeito gratuíto. Este ano contarase coa banda compostelá Ruxe Ruxe, un referente do rock galego e con Pecha a Casela, grupo revelación de Dodro que inicia a súa carreira neste festival. O Festivalo celébrase o 24 de setembro ás 21.00 horas.

Ruxe Ruxe

Con 26 anos de traxectoria e 12 LPs no mercado, Ruxe Ruxe están no seu mellor momento. Despois de celebrar o seu 25 aniversario, comezan na primavera a súa xira de 2022 presentando as cancións que conformarán o novo disco, que promete ser o máis singular da súa carreira.

A banda é sen dúbida un referente do rock galego, movéndose á marxe dos grandes poderes da cultura, das modas e do politicamente correcto. Co espírito de loita por bandeira, do rock do país, do rock libre e de combate, do realismo máxico e do corpo a corpo sincero, directo e emocional, a esencia do ADN dos Ruxe Ruxe queda patente en cada disco editado e en cada concerto que deron dende os seus inicios no ano 96. “Ser de aquí e dun tempo” que diría Celso Emilio Ferreiro, “rapaces da aldea máis non uns ninguéns” que diría Xosé Neira Vilas.

Pecha a Cansela

Procedentes doutros universos musicais, aterran no planeta Rock os Pecha a Cancela, o grupo revelación do panorama musical dodrense. Eles son Antía (voz), Lois (guitarra), Martiño (voz, guitarra e teclados), Jorge (guitarra), Saleta (baixo) e Duarte (bateria). Tras máis dun ano pechados no local de ensaio traen a este concerto de presentación unha escolma de temas clásicos do rock universal pasados pola súa cociña. Vellas melodías interpretadas cun estilo propio que de seguro marcará a evolución deste prometedor proxecto.