O Consello Sectorial de Pesca reuniuse este mediodía no salón de plenos do consistorio local de Ribeira para a abordar a recente decisión da Comisión Europea de darluz verde a aplicación do regulamento comunitario que veda a pesca de fondo en 87 zonas do Atlántico nororiental.
De resultas desta xuntanza acordouse adoptar unha serie de medidas para visualizar a enorme preocupación do sector e concienciar á poboación sobre as gravísimas consecuencias que unha decisión coma esta (que se suma a outras como o Regulamento de Control ou a instalación de eólicos mariños) entrañaría para o futuro do municipio, no que o 50% da súa economía depende da pesca.
Entre as accións que se van poñer en práctica inclúese a celebración dunha concentración multitudinaria o sábado 8 de outubro na praza do Concello (a hora está pendente de determinar, aínda que presumiblemente será pola tarde), de forma similar a outras mobilizacións históricas como a que en febreiro do 2011 levou a milleiros de persoas a protestar na nosa cidade contra os recortes nas cuotas de lirio.
Recollida de firmas Outras medidas acordadas son iniciar unha recollida de firmas, elaborar un manifesto a favor do sector, e dirixirse ao Estado e á Xunta para que defenda a nosa flota de todas as formas posibles, incluíndo a xudicial.
O Consello de Pesca estivo presidido polo alcalde Manuel Ruiz e contou coa participación de representantes de todos os grupos municipais da Corporación, Confraría de Ribeira, Asociación de Armadores de Arrastre, Asociación do Cerco de Ribeira e Aguiño, Lonxa de Ribeira, Asociación de Empresarios de Ribeira e sindicato Comisións Obreiras.
