O BNG de Ribeira pide ao alcalde “máis diálogo” coa veciñanza de Aguiño antes da reforma da rúa Castelao

02 Setembro 2022

O BNG de Ribeira emitiu un comunicado no que insta ao Concello a ter en conta as peticións da cidadanía de Aguiño ante o inminente inicio das obras que limitarán o tráfico na rúa Castelao de Aguiño de face á súa reforma. En palabras dos nacionalistas, “esta actuación foi deseñada de maneira unilateral”.

O portavoz do BNG, Luís Pérez Barral, cre que “un dos principais problemas é a actitude do Goberno local, pois segue facendo actuacións sen contar coa participación social necesaria para que teñan unha boa acollida por parte da veciñanza”. Na súa opinión, “non foi consultada esta actuación coa veciñanza que vive na rúa Castelao, só se fixo unha presentación cando tiñan o proxecto acabado e non deron posibilidade de achegar melloras”. Pérez Barral asegurou que “é imprescindíbel ter en conta as achegas das veciñas e veciños á hora de realizar os proxectos porque se non se fan coa súa participación é cando xorde o malestar que o goberno local está provocando co seu modo de traballar”.

Os concelleiros Luís Pérez e Cruz Rivadulla indican a maiores que “amais da inexistente participación”, “dificultarase a entrada e saída de garaxes por mor do carril bici e non se creará ningunha zona verde”. E engaden: “Van gastar case un millón de euros para aumentar o cemento, eliminar os aparcadoiros e provocar problemas de tráfico, como xa fixeron na reforma das Carolinas ou do Malecón. Se algo sobra neste concello é cemento, precisamos zonas verdes e espazos onde a xente poida desfrutar do seu tempo libre pero no canto de facer iso, gastarán moitos cartos que provocarán un profundo malestar social”.

Con respecto á mobilidade, no BNG recordan que “levan anos traballando e facendo propostas para fortalecer o transporte público e facer de Ribeira e das súas parroquias lugares máis accesíbeis” pero cuestionan o que consideran “unha falta de planificación do Partido Popular facendo obras que carecen de sentido ao non ter un proxecto global e de futuro”. Como exemplo desta falta de planificación, os nacionalistas poñen o carril bici que está previsto facer “que non terá conexión con ningún outro nin hai plans a medio prazo para amplialo”, argumentan, preguntándose “de que vai servir un carril bici que nace e morre na mesma rúa?”

Reunión do BNG coa veciñanza de Aguiño

Outros artigos

Publicidade

Revista en papel

Opinión

“Meus irmáns” – Xulio Xiz

“Meus irmáns” – Xulio Xiz

Fóronse meus dous irmáns: Mato, o maior, e Santi, o pequeno. O maior, morreume hai unhas semanas. O máis novo, o día do Pai. Se Xesús tivo vida longa e froitífera, Santi foise moi cedo despois de poñer unha pica en Bristol. Os tres somos tamén agora irmáns en terra:...