Este domingo 11 de setembro celebrouse finalmente a cuarta edición da Marcha Ciclista Internacional de Outes, unha convocatoria que veu acompañada dunhas condicións climáticas inmellorábeis e que recuperou o formato habitual de experiencia deportiva aberta, lúdica, participativa e activista logo das restricións da crise pandémica. A quedada, organizada novamente polo Club Revoltas, contou coa colaboración do Concello de Outes. Os impulsores da cita agradeceron a colaboración de Protección Civil de Outes e da Policía Local e sobre todo “das familias e persoas que participaron”.
A quedada saíu do CEIP de Outes en dirección até Santo Ourente para volver logo case polo mesmo camiño. Foi, en palabras da organización, “o clásico percorrido que tanto gustou nas edicións previas á COVID”. Unha vez máis, apostouse pola velocidade reducida para lograr “a máxima participación”, con xente de todas as idades e condicións físicas (de aí o de “interxeracional”).
En Santo Ourente os ciclistas participantes desfrutaron dun avituallamento para recuperar folgos e volver con forza. Ao regreso, no colexio da Serra, houbo outro avituallamento para poder repoñer forzas cuns pinchiños.
Todo o percorrido foi por estradas secundarias e apto para calquera tipo de bici.
