Dúas persoas resultaron feridas nun accidente de tráfico rexistrado ao redor das oito desta tarde na estrada entre Ribeira e Aguiño por Carreira na coñecida como curva da Muiñeira, no lugar de Campos.
O sinistro produciuse debido a unha colisión entre tres vehículos e desde Urxencias Sanitarias-061 Galicia, mobilizouse unha ambulancia de Soporte Vital Básico (SVB) con base en Ribeira, que procedeu á evacuación das dúas vítimas ao Hospital do Barbanza.
Ao lugar do accidente acudiron efectivos GAEM (Grupo de Apoio e Emerxencias Municipal ), a Policía Local, Garda Civil de Tráfico e a dotación de garda do parque comarcal de Bombeiros de Ribeira. O accidente dos tres coches bloqueou os dous carrís da calzada e obrigou a desviar a circulación rodada por viais próximos.
