Dúas persoas faleceron e outras dúas resultaron feridas ao colidir tres coches en Noia. Dous feridos noutro accidente na autovía en Rianxo

Bombeiros do Consorcio Provincial Contraincendios e Salvamento da Coruña intervindo nun accidente no corredor de Noia a Brion á altura de San Paio.

Dúas persoas, unha de Noia e outra de Oroso, perderon a vida nun choque no que se viron implicados tres turismos, na CG-1.5, á altura do punto quilométrico 27.

Ademais, outras dúas persoas resultaron feridas no sinistro. Unha delas foi evacuada nun helicóptero ao Complexo Hospitalario Universitario de Santiago de Compostela e a outra persoa foi trasladada nunha ambulancia, tamén ao mesmo centro médico.

Ao fío das 16:00 horas, varios particulares alertaban do sinistro ao 112 Galicia.

De xeito inmediato, os xestores do Centro Integrado de Atención ás Emerxencias (CIAE) 112 Galicia pasaron o aviso a Urxencias Sanitarias de Galicia-061, aos Bombeiros de Boiro, ao GES de Noia, á Garda Civil de Tráfico, á Policía Local e ao servizo de mantemento da vía de circulación. Ademais, desde o CIAE 112 Galicia informouse dos feitos ao Grupo de Intervención Psicolóxica en Catástrofes e Emerxencias (GIPCE), por se fose necesaria a súa intervención.

Cómpre sinalar que, para asegurar as condicións de seguridade na CG-1.5, foi necesario desviar o tráfico tanto na saída 27 como na 19. A estrada quedrou aberta novamente á circulación pasadas as 8 da tarde.

Por outra banda dúas persoas resultaron feridas esta mañá, ao redor das 12.00 horas, despois de sufrir un accidente na autovía de Barbanza. O coche no que circulaban acabou envorcado e os seus ocupantes foron trasladados por unha ambulancia do 061 ao hospital.

Nas tarefas de rescate interviron unha dotación de bombeiros do Consorcio Provincial Contraincendios e Salvamento da Coruña con base en Boiro actuou este mañá xunto á Garda Civil, RTSU de Rianxo, e persoal sanitario do Centro de Saúde de Boiro, SMPC Boiro no mantemento da estrada en accidente con feridos na AG-11 no Concello Boiro.