Dúas persoas detidas por estafa a unha muller de Boiro

O equipo de Milladoiro da Comandancia da Garda Civil da Coruña en materia de ciberdelincuencia investiga a dous homes (un de Burgos e o outro de Vinaroz (Castelló)) por un presunto delito de ciberestafa a unha veciña de Boiro ao contratar un préstamo en liña. A cantidade da estafa ascende aos 18.795 euros.

A investigación emepzou por unha denuncia interposta no cuartel de Boiro pola vítima. Ela explicaba que a principios de marzo localizou un anuncio na internet onde se ofertaban préstamos persoais con comisións baixas. Por iso, púxose en contacto cos anunciantes.

Entón, comezou a recibir correos electrónicos e a manter conversacións por teléfono cunha persoa que, supostamente, tramitaríalle a concesión do crédito por un importe de 60.000 euros. Cando a vítima aprobou a xestión do crédito, os denunciados pedíronlle que realizase unha serie de pagos en concepto de impostos, trámites e honorarios de avogados, entre outros.

Cada vez que ela realizaba un pago, o estafador solicitáballe de novo outra cantidade escusándose en erros bancarios e regulacións de impostos.

A vítima realizou ata 50 pagos que ascenderon en total a 18.795 euros momento no que decidiu interpoñer a denuncia, xa que os estafadores non deixaban de solicitarlle pagos con diferentes escusas e ela non recibía o diñeiro do préstamo na súa conta.

A Garda Civil de Boiro localizou ás dúas persoas que presuntamente realizaran a ciberestafa unha na localidade de Vinaroz que era a que se poñía en contacto coa vítima e xestionaba o diñeiro e a outra en Burgos que era o beneficiario dos pagos. A Garda Civil remitiu as dilixencias ao Xulgado de Garda de Ribeira.