O Concello de Boiro saca a licitación o Proxecto para a restauración de beirarrúas e continuidade de tramo existente na AC-305 ao seu paso por Goiáns por importe de 106.525,87 euros. As actuacións contan con financiamento do Plan Único Concellos (POS+2022) da Deputación da Coruña.
Con esta actuación o que se pretende é realizar dúas actuacións diferenciadas nos marxes da AC-305 ao seu paso por Ponte Goiáns. Por unha parte pretendese dar continuidade a beirarrúa xa existente no tramo sur, un tramo de 172 metros cadrados; e por outro vaise acometer a obra de restauración dun tramo de beirarrúa que da servizo peonil na AC-305. A primeira das actuacións que se pretende é a continuidade dun tramo existente entre os puntos quilométricos 25,44 e 25,62 empregando os mesmos materiais e servizos que a beirarrúa construída. A segunda das actuacións consiste na restauración dun tramo de beirarrúa en mal estado situado entre o PK 25,31 e o PK 26,37 e situada na beira norte da estrada.
O Proxecto de restauración de beirarrúa e continuidade de tramo existente na estrada AC-305 sae a licitación por un importe de 106.525,87 euros e vaise executar mediante o financiamento da Deputación da Coruña a través do POS+ 2022. A presentación de ofertas está aberta na Plataforma de Contratación do Sector Público ata o vindeiro 14 de setembro.
