Boiro convoca a primeira edición dos premios Benestar Social

O Concello de Boiro, a través da concellería de Servicios Sociais, convoca a primeira edición dos premios Benestar Social que teñen como finalidade recoñecer a labor social e de voluntariado. Nesta primeira edición vaise facer entrega de cinco distintivos para poñer en valor accións en beneficio da comunidade.
Este distintivo nace a partir da idea conxunta e da necesidade de agradecer a labor de persoas, entidades ou empresas que fan un traballo desinteresado, á vez que se incentiva o voluntariado. Vaise facer entrega de cinco distintivos que recoñecen os seguintes eidos: voluntariado, entidade, sector empresarial, inclusión e méritos extraordinarios.
Na actualidade estase a levar a cabo unha achega de propostas por parte das entidades para esta primeira edición dos premios. O distintivo de benestar Social do Concello de Boiro busca recoñecer anualmente a labor das persoas, entidades e empresas seguindo uns criterios técnicos e obxectivos.
O concelleiro de Servicios Sociais, Raúl Treus, fixo fincapé na importancia de “recoñecer o esforzo e traballo individual e colectivo a prol do beneficio da comunidade para incentivalo”. “É necesario agradecer a labor das persoas, de nada serve acordarnos a título póstumo”.