Juan Caballero.- O último trimestre de 2022 no calendario de competición oficial da Real Federación Galega de Vela inaugúrao o Club Náutico e Deportivo de Ribeira, coa organización da primeira proba da nova tempada, que será unha regata clasificatoria da clase Optimist, a máis numerosa da comunidade.
Congregando a máis de 150 nenas e nenos de toda Galicia en augas da ría de Arousa, os pequenos embaixadores representan ás escolas e de vela máis destacadas da comunidade, aproximadamente 12 entidades náuticas, poñendo especialmente en valor nesta cita velística co deporte infantil, a propia anfitrioa, a Escola de Vela Ramiro Carregal Rey, promotora do evento con motivo da conmemoración do 50º aniversario da entidade social e deportiva de Ribeira.
Durante dúas xornadas disputaranse seis mangas, cun campo de regatas montado sobre a lámina de auga máis próxima á praia de Coroso, moi visible desde a cidade. As categorías que se distinguen son Sub13, tanto masculina como feminina; e Sub16, tamén masculina e feminina.
Os bocinazos de saída están previstos ás 14.30 horas o sábado e as 10.30 o domingo, coa entrega de premios ás 18.00 h dominicais nas propias instalacións do Club Náutico e Deportivo de Ribeira.
