O Pazo de Goiáns acolle durante todo o mes de outubro a mostra Residentes 2022 cos traballos de Clara Álvarez, Deebo Barreiro e Sol Álvarez. A concelleira de Cultura, María Outeiral, e a directora da galería La Doce, María Magán, acompañaron este xoves 29 de setembro ás artistas na inauguración da mostra.
A actividade ten a súa orixe no certame Residentes: residencias artísticas de Boiro 2022, convocado polo Concello de Boiro e La Doce co obxectivo de incentivar a creatividade e a produción artística visual para contribuír á consolidación e crecemento do sector artístico local. Os traballos gañadores foron as propostas de Sol Álvarez, Deebo Barreiro e Clara Álvarez e que se poden ver no Pazo de Goiáns durante todo o mes de outubro.
Sol Álvarez mostra as pezas de cianotipia realizadas, unha impresión de imaxes en telas. Deebo Barreiro mostra o traballo A pel e o mar con fotografías de peles de persoas vinculadas co mundo do mar. Clara Álvarez amosa unha mostra de material queimado recollido do gran incendio deste verán e cerámica realizada con esa cinsa.