A Consellería do Mar traballa co instituto BDRI (O Grove) para minimizar a interacción das candorcas cos barcos a vela

Co obxectivo de determinar liñas de actuación para minimizar as interaccións das candorcas na navegación de embarcacións a vela e aumentar a seguridade, o centro Bottlenose Dolphin Research Institute (BDRI), con sede no Grove, acolleu este martes 27 de setembro unha xuntanza de traballo entre a presidenta de Portos de Galicia, Susana Lenguas, e o director do BDRI, Bruno Diaz. Este centro, como lembraremos, está especializado no estudo do comportamento dos cetáceos.

A representante do ente público manifestou a súa preocupación e interese en avanzar na investigación e mostraxe ante esta situación e o seu impacto na actividade náutico-recreativa da comunidade, onde, dixo, “os xestores dos portos deportivos teñen constatado unha maior preocupación dos navegantes por esta cuestión”.

Así mesmo, subliñou a necesidade de “afondar en posíbeis ferramentas que trasladen calma ao sector para evitar a afectación aos tránsitos e ao turismo náutico”. Con este obxectivo, froito deste encontro, formularanse proximamente diversas propostas de investigación na liña de definir medidas disuasorias ou sistemas de alerta de presenza destes animais.

Lenguas e Diaz coincidiron neste encontro en que se trata dun “fenómeno recente”, xa que os primeiros casos foron rexistrados en 2020, e que ten “especial incidencia na franxa atlántica”, entre o estreito de Xibraltar e a costa galega. Desde entón teñen proliferado os encontros destes cetáceos con navegantes a vela dado que a época do ano na que as candorcas recorren estas augas se desprazou, coincidindo coa maior actividade náutica. O BDRI trasladou que, a priori, “a interacción cos navegantes explícase como un xogo dos cetáceos na súa aprendizaxe como depredadores”.

Na reunión púxose tamén de manifesto o incremento da natalidade na colonia de candorcas o pasado ano, unha especie que está protexida e en perigo de extinción e da que se estima que existen en torno a 80 exemplares entre Xibraltar e o Reino Unido.