Portosín despediu o verán da mellor maneira posíbel: con festa e reivindicando os seus tesouros, neste caso gastronómicos. Celebrouse o día 17, organizada pola Confraría de Pescadores San Andrés e a Asociación de Empresarios de Portosín (AEP), coa colaboración do Concello e ao abeiro da campaña comercial Portosín Móvese e a marca Azul de Portosín.
Consistiu nunha exaltación de peixes e mariscos locais e nunha axenda festiva na que houbo música, xogos para a rapazada e, por suposto, degustacións. Unha das actividades estrela foi a sexta edición do Concurso de Tapas Azul de Portosín. Nel impúxose finalmente A Casa do Tella e Rosalía con de 4,16 estrelas, 76 votos e un total de 316 puntos.
Estes foron finalmente os establecementos participantes nun certame, que, en palabras das entidades organizadoras, resultou un éxito de participación, repercusión e creatividade:
-A CASA DO TELLA E ROSALÍA – Coca de Xurelo con base de naranxa e maionesa de algas.
-BODEGÓN O PESCADOR – Sardiña andaluza con maionesa de aguacate.
-PARRILLADA A NOSA RÍA – Xurelo ao forno.
-RESTAURANTE O NOSO BAR – Empanada de millo de sardiña.
-RESTAURANTE PORTOFINO – Tosta de sardiña con vinagreta de fresa e tosta de xarda teriyaki con melocotón.
