A Asociación Rianxeira de Empresarios (ARE) ven de asinar un novo convenio de colaboración con novas vantaxes para os seus asociados. Desta vez a nova colaboradora da ARE vai ser a avogada rianxeira Zaida Carou Gómez que vai aportar, en beneficio de tódolos asociados, os seus coñecementos no ámbito da avogacía e, especialmente, nos eidos contractual e mercantil.
O convenio ten unha vixencia inicial dun ano, con posibilidade de renovalo por períodos similares, e recolle a primeira consulta a un prezo reducido e un desconto sobre o arancel oficial do Colexio de Avogados no que está colexiada Zaida. Estas vantaxes, sinala a ARE, aplicaranse tanto para consultas relacionadas coa actividade profesional da persoa interesada como para consultas relativas ao ámbito civil ou penal.
Outro servizo incluído no convenio é o de reclamación de impagos. “Zaida Carou estudará cada caso particular xunto co socio interesado e a reclamación poderase levar a cabo por vía amistosa ou xudicial”, sinalaron fontes da ARE, engadindo que “para este servizo tamén se inclúen no convenio descontos respecto á tarifa oficial”.
Desde a xunta directiva da ARE agradeceron a Zaida Carou a súa colaboración e lembraron a tódolos socios que este convenio únese aos demais que hai en vigor con diversas entidades bancarias e empresas que ofrecen servizos, por exemplo, de protección de datos ou prevención de riscos laborais.
