Viveiro acolle a mostra sobre o naufraxio do vapor-correo Santa Isabel

O Teatro “Pastor Díaz” de Viveiro acolleu o acto inaugural da presentación da mostra sobre o Centenario do Naufraxio do “Santa Isabel” .

Organizado pola Real Liga Naval Española e a colaboración dos Concellos de Ribeira e Viveiro, a Confradía de Pescadores de Celeiro e a Sala-Museo Municipal de Ribeira, a Exposición pasa revista o naufraxio do vapor-correo e a traxectoria do segundo oficial do Santa Isabel, Luís Cebreiro, persoa que sería axudante de mariña da vila cantábrica onde desenvolveu un intenso labor social e de auxilio marítimo, polo que foi unha persoa moi querida no sector mariñeiro da vila.

O alcalde ribeirense foi o encargado de abrir as intervencións e as conferencias sobre o naufraxio

O mestre de cerimonias foi o Delegado en Lugo da Real Liga Naval Española e o acto inaugural contou coa intervención do alcalde ribeirense, Manuel Ruíz, quen abreu o mesmo salientando a importancia que tivo o naufraxio e o papel dos habitantes da comarca no rescate e a prestación de auxilio ás vítimas e tamén o desenvolvido polas mulleres e homes de Sálvora e en especial o do segundo oficial, Luís Cebreiro.

Posteriormente interveu o historiador e xornalista ribeirense, Xosé María Fernández Pazos, director de O Barbanza e autor de varias obras sobre o naufraxio, quen fixo na súa intervención un resumo do naufraxio do vapor-correo Santa Isabel, acontecido hai agora máis de cen anos e no que pasou revista ás causas do naufraxio e o acontecido no mesmo.
Na súa intervención destacou o labor humanitario dos habitantes da illa de Sálvora e de Ribeira destacando amais a figura e o labor de Luís Cebreiro López, segundo oficial do vapor-correo e grande heroe do naufraxio, que logrou salvar a preto de trinta persoas. Tamén narrou anécdotas no que se recolleron as grandezas e miserias humanas froito da desesperación desa noite e das circunstancias da época.
Durante a conferencia o historiador recorreu a historia do buque desde a súa construción, incidentes da súa corta vida ata o naufraxio na madrugada o día 2 de xaneiro de 1921, e no que morreron 213 persoas procedentes de 26 provincias españolas.

O historiador ribeirense, Xosé María Fernández Pazos

Tamén interviu Celestino Vieites, xornalista quen contou diversas anécdotas e alabou o papel xogado polos habitantes de Sálvora e Ribeira e polo segundo oficial Luís Cebreiro. O xornalista propouxo o irmanamento das dúas cidades Ribeira- Viveiro e a creación dunha fundación pública que manteña viva a memoria do naufraxio do que dixo, era o mais importante da historia marítima galega.

Xornalista, Celestino Vieites

As intervencións hístóricas remataron coa de Xosé Luis Moar, documentalista, fotógrafo, comisario da mostra e biógrafo de Luís Cebreiro, quen pasou revista a traxectoria do insigne marino e o papel social que desenvolveu co apoio o mundo mariñeiro e a creación dos “flechas navales”.

Comisario da Exposición, Xosé Luis Moar

Finalmente interviron en nome da familia do oficial, María del Carmen Cebreiro, filla de Luís Cebreiro que emocionada agradeceu o labor feito para destacar a traxectoria do seu pai. Rematou o acto a alcaldesa de Viveiro, María Loureiro García, quen alabou o papel de Luis Cebreiro en pro do pobo e agradeceu o feito por destacar a figura do mariño.

María del Carmen Cebreiro, filla do oficial do Santa Isabel
Alcaldesa de Viveiro, María Loureiro García

O acto inaugural que tivo lugar no Teatro “Pastor Díaz” rematou coa intervención de senllas actuacións musicais a cargo do grupo “Sons de Viveiro” e da “Banda Naval de Viveiro” .

Momento da inauguración da Exposición

Posteriormente procedeuse á inauguración da Exposición “Centenario do Naufraxio do Santa Isabel”, na Sala Exposición Conservatorio de Música-Viveiro, onde se pode ver a mostra sobre Luis Cebreiro e o naufraxio do vapor-correo. Destaca na mesma a colosal maqueta do correo que a escala 1:50 foi realizada por Severino Balseiro e que se pode ver ata o día 31 de agosto.

As autoridades, a familia de Luís Cebreiro e o Comisario da mostra diante da magnífica maqueta do Santa Isabel