Prosegue esta tempada o acondicionamento de espazos públicos impulsado dende o Concello de Porto do Son, que ten o obxectivo de acadar contornas máis acordes para o tránsito dos peóns, máis seguras e accesíbeis e cun máis axeitado impacto visual e estético, acorde co valor histórico dos seus núcleos de poboación. Un dos traballos máis destacados foi o acondicionamento da rúa Santa Irene, que foi obxecto de tarefas de remodelación para devolver boa parte dos seus espazos aos viandantes.
Trátase dunha rúa de sentido único na que transitaban vehículos e peóns e na que existía unha área de estacionamento sen delimitar. As obras desenvolvidas nesta vía urbana, que xa están na súa recta final, achegaron unha nova beirarrúa de formigón e granito no seu primeiro treito, dando como resultado un espazo continuo e seguro para os peóns entre a rúa Avellaneda e o Pavillón Municipal. Santa Irene tamén conta xa con novos equipamentos, entre os que se atopan árbores, bancos, farois, papeleiras, aparcabicis e marquesiñas de aceiro e madeira a carón do Pavillón. As obras foron posíbeis grazas ao Plan Único da Deputación, que achegou 174.994 € da contía total.
