Ribeira rende homenaxe á música e ao vinilo coa celebración, este sábado, da feira Xiradiscos

A praza de Vigo de Ribeira, un dos escenarios simbólicos e emblemáticos da vida cultural, musical e festiva da cidade durante as pasadas décadas, dará acollida este sábado 27 de agosto á primeira edición da feira de vinilo de Ribeira, a feira Xiradiscos, impulsada polo Smart Studio de Nell Martinez, Buena Pieza e o selo discográfico local Radix co apoio do Concello e unha manchea de empresas locais en labores de patrocinio.

Os detalles do evento foron dados a coñecer no mediodía deste luns 22 na mesma praza de Vigo, onde ten a súa sede o Smart Studio e onde transcorreu unha parte importante do periplo vital dos irmáns Nell e Suso Martínez, que agora queren devolver á céntrica praza (con dinamización cultural e homenaxes diversas á música que serviu de banda sonora á historia recente de Ribeira) parte do que esta lles legou.

En Xiradiscos haberá moito disto e outras moitas cousas. Ademais, servirá para dar a coñecer oficialmente o primeiro selo discográfico da localidade: Radix.

Na presentación participaron Nel Martínez e a concelleira María Sampedro; acompañados de Manuel Parada (Radix) e Nati Mirás (Buena Pieza). Segundo fixeron saber, irá adicada “á xente melómana de Ribeira, Barbanza e Galicia, e a todas as persoas afeccionadas a este formato sonoro tan especial: o vinilo”. Amais de coleccións de discos, as persoas que visiten a feira poderán desfrutar de actuacións en directo e sesións de DJ (a cargo dos propios Nell Martínez e Manuel Parada).

Na súa intervención, Nell agradeceu o apoio da longa listaxe de colaboradores e dos patrocinadores, e tamén fixo saber que se vai poñer un especial coidado en achegar as mínimas molestias á veciñanza, cousa que se vai conseguir baixando os graves da música ao máximo. Amais, na presentación deuse a coñecer que haberá actividades para a rapazada, por exemplo un obradoiro de portadas de discos.

Pola súa banda, María Sampedro salientou o carácter “innovador” e “orixinal” da iniciativa, unha proposta que dinamiza culturalmente o centro de Ribeira (e concretamente unha praza que ten especial significado para varias xeracións de ribeirenses) e que homenaxea un xeito de achegarnos á música que segue vixente e uns obxectos, os vinilos, que “son xoias musicais en moitos dos nosos fogares”.

Na presentación tamén se fixo saber que nesta primeira edición da feira Ferrol é a cidade convidada. Isto traducirase na participación de dúas bandas da cidade (as actuacións de Quant e Standord Music Factory) e de varios selos discográficos colaboradores.

Puntos fortes do programa

Entre as propostas que vai albergar o certame destaca un mercadillo de discos de vinilo onde terán cabida os selos CGTH Records, Ferror Records, Lar Gravacións, Pafff Boom e Radix Records

Ademais, da man de Buenapieza haberá un obradoiro infantil de scrapbooking nos que os nenos e nenas que se apunten terán a oportunidade de crear de forma manual o packaging dun disco.

Tamén haberá unha sesión vermú que incluirá unha degustación musical mesturada con vinilos, empanada, cocktail e ambient co músico boirense Toño Ferreirós aos mandos.

E xa a partir das oito da tarde haberá concertos con dous grupos ferrolás: Quant e Sandford Music Factory, para dar paso a continuación a sendas sesións DJ a cargo de Manu Radix e Nell.