A parlamentaria do grupo socialista Noa Díaz rexistrou unha iniciativa parlamentaria reclamando que a Xunta manteña, cando menos, o persoal do IES Virxe do Mar de Noia, “xa que”, explicou, “non teñen intención de cubrir tres baixas por xubilación, e esta situación agrávase dado que xa serían sete os profesionais perdidos dende o curso 2016-17 coa merma na calidade do ensino que leva consigo”, dixo.
Noa Díaz fixo referencia ás declaracións do conselleiro de Educación, Román Rodríguez, nas que sinala que “o curso vai a comezar con normalidade”, polo que a deputada socialista preguntouse “a que normalidade se refire cando estamos a observar recortes no persoal dunha gran cantidade de centros en toda Galicia”.
A representante socialista sumouse ás reclamacións do profesorado do IES Virxe do Mar de Noia, que a finais do mes de xullo emitiu un comunicado para manifestar o seu “total desacordo” coa intención do Goberno galego de non cubrir as tres baixas por xubilación cara ao curso 2022-23.
Denunciou Díaz que “os profesores veranse obrigados a impartir clases para as que non teñen formación específica nalgúns casos, ou incluso, haberá materias optativas suprimidas, ante a falta de docentes, nas que xa estaban alumnos matriculados”.
Díaz dixo non comprender que “ante un aumento do alumnado, a Xunta de Galicia estea a recortar o persoal dun centro de ensino vital para o municipio de Noia”. E engadiu: “Están abandonando non só á comunidade educativa, senón ao conxunto da sociedade noiesa que está a perder calidade no educación público, o primeiro chanzo para a igualdade real de oportunidades”.
