A deputada provincial de Igualdade, María Muíño, reuniuse con Mónica Permuy, presidenta da Fundación Meniños, e con Diana Rodríguez, profesional de esa entidade, para falar do proxecto Benquerer, un programa da fundación que conta co apoio económico da Deputación e que o curso que vén achegará educación afectivo sexual ao alumnado de 5º e 6º de Primaria dos colexios galegos ̣̣̣̣(dez deles, da Coruña) por medio de actividades e material audiovisual que responda aos intereses e demandas propios desta idade. A participación dos centros será totalmente gratuíta.
Un dos puntos máis destacados da iniciativa é a proposta virtual do Colexio do Benquerer, que permitirá ás crianzas profundar nos cambios físicos, psicolóxicos, cognitivos e relacionais que acontecen nesta etapa do alumnado. Isto farase a través da fórmula do “bo trato, o respecto, a confianza e o pensamento crítico”, sinalaron.
As 20 actividades do proxecto estrutúranse en 5 áreas, cada unha das cales con catro actividades: coñecemento e aceptación persoal; diversidade; comunicación e educación emocional; prevención do abuso sexual infantil; e análise social. Os nenos e nenas participantes terán acceso ás mesmas por medio dunha imaxe interactiva, que lles permitirá coñecer ao profesorado do Benquerer e introducirse en cada unha das materias.
A Fundación Meniños é unha entidade de acción social sen ánimo de lucro especializada na protección da infancia e da adolescencia, cun traballo orientado a garantir o seu dereito a vivir en familia. Desde 1996 traballa a favor dos dereitos dos nenos e nenas en situación de dificultade social por medio de programas especializados de prevención e intervención familiar en colaboración coas administración, e outras entidades e organizacións.
