O Concello de Boiro programa charlas informativas sobre golpes de calor e picaduras

O Concello de Boiro ofrece unhas xornadas informativas sobre golpes de calor e como evitalos, destinadas principalmente a persoas maiores. A actividade, que forma parte do programa Coida a túa saúde que desenvolve o departamento de Servicios Sociais, terá lugar os días 12 e 13 de agosto nos
centros sociais e veciñais dos núcleos máis grandes de poboación das parroquias.
O obxectivo desta actividade é ofrecer unha maior saúde e benestar aos veciños e veciñas de Boiro. Esta primeira actividade do programa versará sobre como previr os golpes de calor e como tratar as picaduras, que serán impartidas por equipos sanitarios e están destinadas principalmente a persoas
maiores.
As xornadas van ter lugar nos centros sociais e veciñais de Cespón, Beluso, Cures, Abanqueiro, Escarabote, Boiro e Cabo de Cruz; serán de unha hora de duración e as persoas asistentes poderán formular as súas dúbidas e consultas. “Levamos tempo planificando un programa como este e que
axilizamos debido aos problemas que as altas temperaturas ocasionaron este ano por todo o país, sobre todo na xente maior”, afirmou o concelleiro de Servicios Sociais, Raúl Treus.
O Concello de Boiro, a través da Concellería de Servicios Sociais, aposta por levar a cabo programas de benestar social e tamén actividades informativas sobre temas que preocupan á poboación. “Boiro aposta polo benestar social de veciños e veciñas, familias e persoas maiores con actividades como esta que inciden directamente na saúde”, recoñeceu o alcalde José Ramón Romero.
Dende o departamento de Servicios Sociais estase xa a traballar para levar a cabo outras actividades dentro do programa Coida a túa saúde como son cursos e xornadas de cociña, charlas de nutrición… As persoas interesadas en participar nas xornadas informativas sobre golpes de calor so teñen que asistir a algunha das charlas programadas, sen necesidade de inscribirse previamente.

Programación das charlas:
Venres 12 de agosto, 16.00 horas – Centro Social de Cespón
Venres 12 de agosto, 17.00 horas – Unitaria de Ponte Beluso
Venres 12 de agosto, 18.00 horas – Centro Social de Cures
Venres 12 de agosto, 19.00 horas – Centro Social de Abanqueiro
Venres 12 de agosto, 20.00 horas – Centro Social de Escarabote
Sábado 13 de agosto, 11.00 horas – Centro Social de Boiro
Sábado 13 de agosto, 12.00 horas – Centro Social de Cabo de Cruz