Ante a imposibilidade de poñer freo, coas disposicións actuais das administracións (ben pouco efectivas), á proliferación de cabichas nas nosas praias, colectivos como Noia Limpa están a ofrecer alternativas reais para os fumadores. Segundo vén de informar a asociación, colocou dous expositores con cinceiros portátiles na entrada á praia de Testal, na entrada do paseo peonil, xunto ao bar móbil. O obxectivo é favorecer un cambio de hábitos entre os bañistas, “xa que, malia ser Testal unha praia sen fume, seguen aparecendo moitas cabichas neste areal”.
O colectivo engade que estes borralleiros portátiles instaláronse para que os bañistas que acudan á praia poidan coller un, usalo e, á volta, baleiralo e volver a deixalo para que poidan usalo outras persoas. Por este motivo habilitáronse na entrada ao paseo e tamén preto dos contedores de lixo, “para que o acceso aos cinceiros e tirar as cabichas non supoña un esforzo para os usuarios”, sinalan dende a asociación, engadindo que tanto estes recipientes coma os seus soportes están feitos tamén con materiais de refugallo, que foron decorados por mozas e mozos de Noia nunha actividade do Espazo Xove da Casa da Xuventude de Noia.
O colectivo lembra que as cabichas están consideradas como un dos principais residuos a nivel mundial, “xa que ademais de tardar décadas en desaparecer ou desintegrarse, adoitan rematar nos sumidoiros, chegando en moitos casos aos ríos e ao mar”.
Segundo datos da ONG SEO/Birdlife o efecto contaminante das cabichas pode durar entre 7 e 12 anos na auga (outros estudos falan de máis tempo, ata 25 anos) e cada cabicha individualmente pode chegar a contaminar entre 8 e 10 litros de auga salgada e ata 50 litros no caso da auga doce.
