A praza de Vigo de Ribeira, un dos escenarios simbólicos e emblemáticos da vida cultural, musical e festiva da cidade durante as pasadas décadas, acolle este sábado 27 de agosto a primeira edición da feira de vinilo de Ribeira, a feira Xiradiscos, impulsada polo Smart Studio de Nell Martinez e o selo discográfico local Radix co apoio do Concello e unha manchea de empresas locais en labores de patrocinio.
Puntos fortes do programa
Entre as propostas que vai albergar o certame destaca un mercadillo de discos de vinilo onde terán cabida os selos CGTH Records, Ferror Records, Lar Gravacións, Pafff Boom e Radix Records
Ademais, da man de Buenapieza haberá un obradoiro infantil de scrapbooking nos que os nenos e nenas que se apunten terán a oportunidade de crear de forma manual o packaging dun disco.
Tamén haberá unha sesión vermú que incluirá unha degustación musical mesturada con vinilos, empanada, cocktail e ambient co músico boirense Toño Ferreirós aos mandos.
E xa a partir das oito da tarde haberá concertos con dous grupos ferrolás: Quant e Sandford Music Factory, para dar paso a continuación a sendas sesións DJ a cargo de Manu Radix e Nell.
