Efectivos da Policía Nacional e Local de Ribeira detiveron a unha persoa acusada dunha presunta agresión con arma branca a outra no interior dun edificio de okupas da Rúa Xosé Ramón Fernández Barreiro, no barrio residencial de Abesadas. Os feitos rexistráronse ao redor das once e media da pasada noite, ao parecer, no trascurso dunha discusión entre ambos o ir a coller auga nunha zona da primeira planta do soto do devandito inmoble na que se acumula ese líquido elemento.
A autorización de entrada e rexistro no edificio por parte da titular do Xulgado de Primeira Instancia e Instrución Número 2 de Ribeira, en funcións de garda chegaría de madrugada e foi entón cando se procedeu á entrada e detención do sospeitoso. A identidade do detido responde a un home de 57 anos da Pobra, que foi trasladado aos calabozos da comisaría ribeirense, á espera de pasar a disposición xudicial. Segundo transcendeu, a identidade da vítima responde a unha persoa de 41 anos e de Ribeira.
Segundo parece, o agora arrestado supostamente causoulle tres feridas nun costado, no ombreiro e nas costas ao outro home.
Ata o lugar acudiu unha ambulancia do 061, que trasladou ao ferido ao hospital. Tamén o fixeron dúas patrullas da Policía Local de Ribeira e unha da Policía Nacional, que trataron de deter ao presunto autor da agresión, un veciño da Pobra de 57 anos que responde as iniciais R. S. G., e que se atrincheirou nunha das vivendas, desde a que supostamente lanzou á rúa auga fervendo.
