Os concellos teñen protocolos para a concesión de honores, entre os que destacan a declaración de fillos predilectos dos que naceron no concello que teñen méritos públicos notorios, e de fillos adoptivos para similares méritos dos que naceron fóra.
Esas distincións precisan o inicio dun expediente que se someterá a votación do pleno municipal. O normal nestes casos é que o tema se leve con discreción, para que se hai dificultades para o acordo non transcendan ao público, sendo convinte o consenso previo para evitar sorpresas.
O caso de Corcubión, que declarou fillo adoptivo a Darío Xohán Cabana a título póstumo, é exemplo claro de que hai que consultar primeiro antes de outorgar un agasallo que pode estar envelenado, ou non ser convinte, a xuízo da familia, que é soberana.
Parte dos grupos do concello quixeron facer Fillo Adoptivo a Darío polos seus anos en Corcubión, e se foi erro grave non consultalo coa familia, foi despois non lograr a unanimidade imprescindible na Corporación. A familia rexeitou a distinción, e o Concello veuse na obriga de anulala,
Se investigasen, saberían que Darío non estivo a gusto en Corcubión os últimos tempos, e hai testemuñas, e xa que o antigo alcalde ameaza cunha querela contra a familia por insinuar que non estivo a gusto baixo as súas ordes, vese que tampouco investigou abondo o que daquela alí ocorría. Darío veu para Lugo contento por volver á terra, pero tamén polo cambio de ambiente. A súa familia ten razón. Sabendo o que sabemos os amigos, Darío non aceptaría ser Fillo Adoptivo de Corcubión. E a familia tiña, ten, o deber de respectar o seu sentir.
