O Concello da Pobra do Caramiñal prosegue achegando actividades e propostas para dinamizar e revitalizar a vida económica e empresarial na vila e na súa contorna. Nesta liña encádrase a sétima edición de Comercio na Rúa, unha iniciativa na que van participar oito establecementos locais mostrando os seus produtos e servizos no Cantón da Leña os días 13, 14 e 15 de agosto, en horario continuado de 11.00 a 23.00 horas, e contará tamén con actividades de animación.
O obxectivo, segundo fixo saber a edil Charo Varela, “é xerar un espírito de comunidade comercial, incentivar as compras nos locais de proximidade, poñer en valor os seus servizos e facilitarlles unha maior proxección aproveitando a época estival e un espazo tan concorrido da vila”. A iniciativa foi dada a coñecer pola concelleira da Promoción Económica, Charo Varela (Nós Pobra), xunto coa técnica municipal desta área, Sara Sánchez, e algunhas das persoas propietarias dos negocios que formarán parte desta acción.
A oferta de produtos de tempada vai dende a alimentación ao téxtil e os comercios participantes son Burbujas, Fina Campaña, Amar Amares, Sweet & Roll, LuscoFusco, Entrena Galicia, El taller del calzado e Carey.
