Este 5 de agosto celebrouse a presentación do Circuito Barbanza Arousa 4 Carreiras, 1 Meta, un destacado itinerario deportivo, de lecer e cultural que percorrerá unha parte importante dos nosos lugares máis emblemáticos, por exemplo cascos históricos, paisaxes de impacto e recursos naturais e culturais de incalculábel valor.
A presentación celebrouse no entorno da Casa Mariñeira, na Pobra do Caramiñal, lugar de paso dunha das carreiras. Participaron o presidente da Mancomunidade Barbanza Arousa, Xosé Lois Piñeiro; Xusto Ordóñez, concelleiro de deportes de Rianxo; Genoveva Hermo, concelleira de deportes de A Pobra do Caramiñal, Dores Torrado, concelleira de deportes de Boiro e Javier Sampedro, concelleiro de deportes de Ribeira; técnicos de deportes dos catro concellos e Fátima Cachafeiro, xerente da Mancomunidade.
Segundo fixeron saber, o circuíto é un programa anual de carreiras que fomenta a práctica da actividade deportiva na natureza “ao mesmo tempo que se coñecen os recursos e paisaxes do destino Barbanza Arousa”. Está promovido e organizado de maneira colaborativa entre a Mancomunidade Barbanza Arousa e as concellerías de deportes de A Pobra do Caramiñal, Boiro, Rianxo e Ribeira.
O circuíto está composto por un total de 4 probas, iniciándose na Pobra do Caramiñal o día 28 de agosto, continuando en Ribeira o 24 de setembro e en Rianxo o 1 de novembro para rematar en Boiro o 4 de decembro.
Esta actividade inclúese dentro das estratexias da Mancomunidade de promover o turismo de natureza e activo e desestacionalizar a demanda, demostrando que Barbanza Arousa “é un destino para desfrutar durante todo o ano”, sinalaron.
Na experiencia poderán participar todas aquelas persoas que o desexen, sexan ou non federadas no deporte do atletismo e sexa cal sexa a súa procedencia. “Asemade”, explicaron na presentación, “trátase dunha actividade que gañaba seareiros en anteriores edicións, que foi interrompida pola pandemia, e que este ano se retoma con grandes expectativas debido ás consultas xa recibidas por parte de interesados”.
Os premios serán económicos e tamén incluirán experiencias turísticas no destino Barbanza Arousa, co afán de dar a coñecer o territorio e continuar potenciando unha rede de prescriptores do mesmo.
