A Xunta está a ultimar os traballos nas áreas afectadas polo lume na contorna do Barbanza, co obxectivo de evitar os arrastres das cinzas nas áreas límites do rego de Castelo e nas do rego das Lobeiras, ao seu paso polo municipio de Ribeira.
Os equipos de Conservación Fluvial de Augas de Galicia, dependentes da Consellería de Infraestruturas e Mobilidade, están a desenvolver estes días os traballos, iniciados a pasada semana, ao longo de aproximadamente 2.600 metros, nas áreas límites destes regos, ambas as dúas no termo municipal de Ribeira.
Para evitar estes posibles arrastres, a Xunta deseñou unhas barreiras de contención aproveitando a propia madeira que se atopa nas ribeiras afectadas, e está a aplicar a técnica coñecida como “mulching”, mediante a disposición de palla sobre as áreas afectadas e con maior risco de erosión.
Deste xeito, actúase nestas contornas de especial sensibilidade pola proximidade dos leitos fluviais a zonas poboadas e por contar cunhas características singulares que poden favorecer os arrastres das cinzas.
Estes traballos son froito das inspeccións de campo realizadas polos técnicos de Augas de Galicia, en coordinación cos técnicos da Consellería do Medio Rural, a través do Centro de Investigacións Forestais de Lourizán. Estas inspeccións nas áreas afectadas permitiron determinar os puntos máis afectados polos incendios, co obxectivo de iniciar os traballos precisos coa maior celeridade posible.
