A Rede Cultural da Deputación ofrece 138 espectáculos até o remate do verán

A Rede Cultural da Deputación da Coruña brinda á cidadanía 138 espectáculos ata o final do verán. A programación (até finais de setembro) inclúe 28 películas, representacións de teatro, circo e monicreques, 14 espectáculos de narración oral e de promoción da lingua e 91 concertos musicais, ademais de espectáculos de maxia e danza.

O responsábel de Cultura da Deputación da Coruña, Xurxo Couto

Como explica o responsábel do departamento de Cultura, Xurxo Couto, “un ano máis non quedará un concello de toda a provincia que non poida gozar da nosa oferta, xa claramente consolidada como a aposta máis potente e estable a nivel institucional para para achegar propostas de calidade a todos os municipios coruñeses”.

O programa Visións achegará 28 filmes, entre os que están Cuñados, El cuarto de Mona, O gran Camiño, Mi amigo Pony ou A galiña Turuleca.

38 serán as actuacións dos grupos de música, danza e teatro non profesionais do programa Alicerce, que no que queda de verán programará concertos da Banda de música de Arca, Regueifeir@s de Galicia, Pandereteiras sen fronteiros, Tropicalia Troupe, Charanga Santa Compaña ou A Chiqui Band do Laboratorio.

Danza, música, teatro e monicreques conforman a oferta de Escena a vivo, 105 espectáculos nos se poderá ver o último de Marta Alonso Tejada, Pablo Díaz, Vella Escola, Dixie Kings, Cristian Leggiero & Paty Lesta, Xabier Díaz & Adufeiras de Salitre, Ruxe Ruxe, De Vacas, Luar na Lubre, Dios Ke Te Crew, Silvia Penide Trío, A xanela do Maxín, Pedras de Cartón, Teatro do Noroeste, Aldaolado, Ibuprofeno Teatro, Moc Moc MeRe Clown ou Circo Chosco.

Tamén música, teatro e maxia teñen un oco na programación de Lingua a escena!, que ofrecerá 14 espectáculos de narración oral e de promoción do galego, como os de Zënzar, Caramuxo Teatro, A Gramola Gominola, Mago Antón ou Migallas Teatro. A maxia ten un lugar propio na Rede Cultural: ata outubro 8 actuacións dos mellores ilusionistas do país; entre eles, Mago Paco, Mago Teto, Dani Polo, Mago Noel ou Mago Xacobe.

A Rede Cultural da Deputación programou para este ano e o primeiro trimestre do 2023 un total de 1.408 espectáculos en todos os concellos da provincia, cun investimento de 1.509.836,71 euros.