A Asociación Veciñal San Xoán de Laíño, a xeito de homenaxe a Moncho Reboiras, figura destacada do nacionalismo galego e da loita polas liberdades, programou para esta semana un espectáculo teatral coa compañía Avelaíña Teatro. Trátase da función A Lola, de Manel Ayán, que será representada este venres 12 de agosto ás 21.00 horas no local social do Montiño en Imo.
Sinopse
A Lola son todas as mulleres que sobreviviron aos seus maridos, arrebatados polo terror franquista.
O relato lévanos ao presente (mediados dos anos sesenta) e ao pasado (os anos da Segunda República e os inmediatamente posteriores ao golpe militar de xullo de 1936).
David e Teresa, mozos abertos aos novos aires que comezan a infiltrarse na sociedade española, deciden casar e visitan a casa nativa para comunicarllo aos seus pais. Pero os traumas do pasado seguen presentes: a historia dos pais de Teresa, familia comprometida dende o primeiro momento co novo réxime e a dos pais de David, identificados cos ideais republicanos, frustran os desexos dos mozos.
Na obra recréase o ambiente, ideais e confrontacións entre as dúas formas de entender a sociedade: os valores da tradición patriarcal e escolástica dos golpistas fronte as ideas constitucionais de progreso e liberdade.