Juan Caballero.- Practicamente, con puntualidade meridiana, a XI Regata Congalsa arrincou arredor das 14.00 horas, tal e como estaba previsto no programa da competición que organizou, de maneira brillante, o Club Náutico Deportivo de Ribeira.
Unha vintena de embarcacións trazaron a volta a Sálvora, en sentido de sur a norte, aproveitando o 180 no eixo do vento, é dicir, sur cravado, con 6 nós na saída.
O Comité escolleu o numeral 2, entre as diferentes opcións, o máis sinxelo e directo dos rumbos, para garantir a finalización da regata, xa que a previsión meteorolóxica apuntaba a que, a media tarde, a
compoñente iríase desprazando cara á dereita para quedar, finalmente, nun 320, é dicir, un noroeste que mantivo a súa presión nos 7 nós.
Na clase Regata o vencedor desta XI Regata CONGALSA foi o Chispetrén, de Jesús Iglesias, do Club Náutico Arousa Norte, con Ziralla Primeiro, de Ramón Barreiro, do Ro Yacht Club, na segunda praza, sendo o bronce para o Leonciño, de Pablo Mallo, do Club Náutico e Deportivo de Ribeira.
En Cruceiro/Regata o posto dourado do podio foi para o Orión, de Alberto Pérez, do Monte Real Club de Iates de Bayona, seguido do Cámping Ría de Arousa, de José Manuel Pombar, do Club Náutico Arousa Norte. Terceiro, nesta División, foi o Cinco Islas Albariño, de Iñaki Carbajo, do Club Náutico Beluso.
Nos Cruceiro levou o triunfo o Galopín, de Manuel Franco, do Club anfitrión, o Náutico de Ribeira, grímpola que tamén defendeu o segundo clasificado que foi o Arousa VI, de José Luis Torres Colomer,
indo para o Club Náutico de Rianxo a terceira praza, a través do seu representante Gerardo Sánchez, ao temón do Orlando.
A entrega de premios celebrouse ás sete da tarde nas instalacións do Club Náutico e Deportivo, en presenza do alcalde de Ribeira, Manuel Ruiz; a responsábel de Relacións Externas de CONGALSA,
Isabel Cañas; o presidente da entidade social e deportiva, José Luis Torres Colomer, acompañado dos seus directivos Justo Arevalillo, Francisco Muñiz, Ramón Doval e José Díaz; o concelleiro de seguridade cidadá de Ribeira, Víctor Reiriz; o capitán marítimo de Vilagarcía, Juan Andrés Pérez; a presidenta de Cruz Vermella de Riveira, Ángeles Cores; e a presidenta da Asociación de Amas de Casa de Ribeira, Puri Cores.