Proseguen na Pobra as actividades de divulgación marisqueira na praia dos Raposiños

A praia dos Raposiños da Pobra do Caramiñal acolleu este martes 26 de xullo unha nova xeira de divulgación marisqueira abeirada aos obradoiros que impulsa a Concellaría do Turismo coa colaboración da Asociación Mar da Pobra. Esta proposta lúdico-formativa focalizouse como dixemos na praia dos Raposiños, onde as persoas que participaron puideron comprobar o proceso extractivo dos bivalvos da man das mariscadoras tras unha charla introdutoria ofrecida por unha das técnicas do Turismo do Concello.

Trátase dunha actividade xa consolidada na axenda estival pois, en palabras da edil Charo Varela (Nós Pobra), xurdiu no 2017 para poñer en valor e transmitir a tradición mariñeira da localidade e o oficio da xente do mar, ademais de concienciar sobre a importancia do coidado das contornas naturais. O éxito acadado fixo que se diversificase neste ano ofertándoa tamén a centros de ensinanza de toda Galicia no período lectivo.

As seguintes xornadas de turismo mariñeiro transcorrerán nos xoves de agosto (días 4, 11, 18 e 25) e venres de setembro (días 2 e 9), dividíndose entre as praias dos Areos e a dos Raposiños en función da marea. O prezo, que inclúe viseira e receitario, estipúlase en 12 euros por persoa adulta e de balde para menores de 10 anos. As reservas pódense formalizar na oficina do Turismo -situada na Casa Mariñeira-, a través dos teléfonos de contacto 671 090 262 e 687 482 835, ou mediante o enderezo electrónico turismo@apobra.gal.