Antón Luaces.- A veda anual da centola na zona litoral comprendida entre A Guarda e cabo Corrubedo (Ribeira) e de cabo Corrubedo ata a Estaca de Bares, comezará o vindeiro sábado, 25 de xuño, para rematar o 6 de novembro. Entre a Estaca de Bares e o río Eo (incluída a ría do Barqueiro) a veda vai comezar o sábado, 2 de xullo, prolongándose ata o 27 de novembro.
Así o determina o plan de xestión da centola e do boi para a campaña 2022-2023 publicada este mércores no Diario Oficial de Galicia, que marca vedas diferenciadas para ambas as especies. Este ano non se permite a extracción de centola nas provincias da Coruña e Pontevedra desde as 00,00 horas do 25 de xuño ata as 00,00 horas do domingo, 6 de novembro. Na provincia de Lugo a veda levarase a cabo entre as 00.00 horas do 2 de xullo e as 00,00 horas do 27 de novembro, domingo.
No caso do boi de mar, a veda estabelecerase en todo o litoral de Galicia desde as cero horas do sábado 3 de setembro ata as 00,00 horas do domingo, 6 de novembro.,
Queda polo tanto expresamente prohibida a captura destas especies a todas as embarcacións por medio de calquera arte en augas galegas- De feito, as nasas dedicadas á captura de centola ou boi deben ser retiradas do seu calamento e trasladadas a porto.
