Unha trintena dos maiores que participan nos Obradoiros da Memoria de Lousame celebraron unha festa de fin de curso

Unha trintena de maiores participou este mércores 22 de xuño na festa de fin de curso dos Obradoiros da Memoria do Concello de Lousame 2021-2022. A celebración desenvolveuse nas instalacións do Club de Xubilados de Aldeagrande e nela as participantes nos obradoiros estiveron acompañados pola alcaldesa de Lousame, Teresa Villaverde, e a concelleira de Servizos Sociais, Silvia Agrafojo.

Teresa Villaverde e Silvia Agrafojo entregaron cadanseus diplomas acreditativos ás persoas participantes nos obradoiros e instáronas a “seguir participando nas distintas actividades para adultos que se organizan no Concello de Lousame” e a convidar aos veciños e veciñas a sumarse a elas, sobre todo despois dunha pandemia sanitaria que fixo que moitas persoas maiores continúen sen saír da casa.

Tras a merenda, o grupo O Son do Pote tocou algunhas pezas no exterior do club e non foron poucas as persoas que se animaron a botar unhas bailas, incluídas as voluntarias acabadas de arribar a Lousame, Ezgi Alkaya e Ülkü Kosdas, as dúas voluntarias turcas que participan no programa de Voluntariado Europeo e que comezan a colaborar nas actividades que desenvolve o Concello.