O PSOE reclama á Xunta que garanta todo o ano o servizo de pediatría no Centro de Saúde do Son

A deputada socialista Noa Díaz reclamou á Xunta que “garanta durante todo o ano o servizo de pediatría do Centro de Saúde de Porto do Son, cubrindo de xeito inmediato as ausencias da única profesional que presta alí o servizo”. Fíxoo este martes 21 de xuño, durante unha visita á vila xunto ao representantes locais do PSdeG.

Segundo explicou, “o concello de Porto do Son sofre dende hai anos o abandono no seu servizo de pediatría, que funciona de maneira deficitaria ao non cubrir as baixas ou licenzas da súa única profesional, o que provoca que cando a pediatra non acude ao centro por causas xustificadas, a veciñanza ten que ir deambulando dun centro a outro da comarca para ser atendida”.

Díaz dixo que se chegou ao punto de que as nenas e nenos “sexan convidados a agardar á tarde para poder acudir ao PAC de Ribeira ou desviados a outros centros de saúde nos que os e as profesionais xa se manifestaron contrarios a esta decisión pola imposibilidade de prestar atención pediátrica a máis doentes cos mesmos recursos”.

Para a parlamentaria, a atención sanitaria no Barbanza “adoece de falta de atención por parte da Consellaría de Sanidade, que prexudica esta comarca ao non garantir a cobertura de profesionais, o que repercute de maneira global en todos os concellos, xa que provoca a saturación dos centros de saúde máis próximos”, alertou.

A socialista rexistrou unha batería de iniciativas no Parlamento de Galicia para “urxir á Xunta unha solución á problemática que permita ofrecer un servizo de calidade ás nenas e nenos do municipio”.