O Grupo Municipal Socialista de Noia rexistrou para o seu debate no pleno ordinario de xuño unha moción para instar á Xunta de Galicia a iniciar a reforma do Plan de Saneamento de Noia. Os socialistas poñen o foco na situación de praias como a de Testal, onde novamente as súas augas obteñen unha clasificación sanitaria final insuficiente, o que representa cinco tempadas consecutivas acadando a dita etiqueta e onde se volve pendurar a prohibición permanente de baño. “Isto”, din os socialistas, “é algo que a Corporación municipal non debe nin normalizar nin aceptar”.
Dende o G. Municipal do PSdG-PSOE indican que “como representantes dunha cidadanía que vive principalmente do mar, debemos solicitar ás autoridades competentes que cumpran ca súa función e, dunha vez por todas, fagan todo o posíbel para acadar o saneamento integral de toda a ría de Noia”.
Consideran os socialistas que están amparados por “razóns medio ambientais e económicas, a nivel marisqueiro coma turístico”, e engaden que “non podemos permitir que siga pasando o tempo e vendo como as administracións non solucionan unha cuestión que a cidadanía non pode aceptar, como é que a nosa praia non sexa apta para o baño e non fagamos nada para remedialo”.
Tal como indicou o voceiro Roberto Iglesias no pasado pleno, “consideramos que a prioridade número un do Goberno municipal debe ser conseguir que se mellore o saneamento, vemos urxente solicitar que dende a Xunta de Galicia se comecen a dar todos os pasos para poñer en marcha unha solución axeitada, unha vez identificada no Plan Director de Saneamento, presentado xa hai uns meses”.
Por todo isto, o PSdG-PSOE presenta unha moción cos seguintes acordos:
1.-Instar á Xunta de Galicia a iniciar o proxecto da identificada como solución número 3 no Plan Director de Saneamento de Noia, e a súa inclusión nos orzamentos do ano 2023.
2.- Solicitar á Consellería de Infraestruturas e Mobilidade, o encargo dun estudo da contaminación na desembocadura do río Tambre, a posíbel afectación na actividade marisqueira e que identifique as solucións para mellorar a calidade das augas.
