O Concello de Boiro adxudica as obras para a mellora da eficiencia enerxética no CEIP Santa María do Castro

O Concello de Boiro vén de adxudicar as obras para a mellora da eficiencia enerxética do CEIP Santa María do Castro. O proxecto, dun orzamento de 114.925,80 euros conta co financiamento da Deputación da Coruña a través do Plan Único Concellos (POS+2021).

A obra que se vai a executar consiste na realización do illamento térmico exterior no edificio principal do dito centro de ensino. Na actualidade a clasificación enerxética do centro clasifícase como moi deficiente (G), explica o Concello, engadindo que “coa realización do sistema de illamento STAE previsto o inmóbel pasará a unha situación media-baixa (E)”.

O sistema de illamento STAE que se contempla para a execución deste proxecto está composto de placas de illamento térmico de polistireno. Mediante estas actuacións, ademais de mellorar a eficiencia enerxética, vanse eliminar pontes térmicas, humidades por condensación e colonizacións de fungos, así como obter unhas axeitadas condicións de confort interior e salubridade dun edificio destinado a centro de ensino.