O Servizo de Explotacións Agrarias da Coruña ( Medio Rural da Xunta), vai celebrar na Pobra un curso de formación profesional en normativa sanitaria esixíbel e uso sustentábel de produtos fitosanitarios na produción primaria agrícola. A formación será na aula de estudos do Instituto Social da Mariña o vindeiro 28 de xuño, cunha duración total de 5 horas en horario de tarde (16:00 ás 21:00 horas).
O obradoiro aborda tres bloques de contido. Os dous primeiros centraranse na normativa sectorial; o terceiro e último instruirá aos alumnos no manexo de diferentes tipos de documentación, coma cadernos de campo e rexistros de limpeza, así coma un repaso polas diferentes normas de hixiene.
A Axencia Galega da Calidade Alimentaria, a través da formación non regrada e dentro do Plan de formación continua 2022, pretende “dar a coñecer as obrigas dos operadores expostas na lexislación en materia de produción primaria e hixiene”. A iniciativa diríxese ás persoas ligadas profesionalmente, ou con expectativa de incorporación, aos sectores produtivos gandeiros, agrarios, agroalimentarios e de cadea forestal-madeira. Así mesmo, o obradoiro tamén pretende ofrecer unha oportunidade laboral á xuventude do medio rural galego.
Lembrar que Medio Rural conta cun plan de accións formativas e de transferencia para este ano que pode consultarse en liña. Nesta páxina pode atoparse o referido curso e facer a pre-inscrición cubrindo os datos necesarios. O coordinador poñerase en contacto coas persoas interesadas a través do correo electrónico comunicándolle se está ou non admitido. Para consultar calquera dúbida, pode chamarse ao teléfono 981 184 548, ou enviarse un correo a antonio.rivera.martinez@xunta.gal.
