En Boiro adxudicadas as obras para a execución de beirarrúas dende Cespón a Quinteiro

O Concello de Boiro vén de adxudicar as obras para a execución de beirarrúas e servizos dende Cespón a Quinteiro pola beira este. Unha actuación moi demandada pola veciñanza da zona e que se vai levar a cabo con cargo ao POS+ 2021 da Deputación da Coruña.
O proxecto para a execución de beirarrúas vaise desenvolver na estrada DP-1106 nun tramo que discorre entre Cespón a Quinteiro e contempla a beira este entre os puntos quilométricos PK 4,700 e PK 6,200. O obxectivo desta actuación é mellorar a seguridade viaria e dotar á parroquia de redes separativas de pluviais e fecais, rede de calidade de subministro de auga e lumeado público que garante unhas condicións axeitadas de seguridade viaria.
As obras vanse executar nun tramo de 1500 metros lineais nos que se vai instalar unha rede separativa de pluviais e fecais que contará con 30 arquetas, sumidoiros e unha rede de auga potable que permita dispoñer de abastecemento municipal, para o que se van colocar un total de 30 acometidas domiciliarias e 3 hidrates para o servizo de bombeiros.
As actuacións completaranse coa execución dunha beirarrúa de 1,5 metros de ancho ao longo de toda a marxe da estrada e que contará con alumeado público realizado con rede soterrada eléctrica e luminarias tipo LED.
O orzamento total da obra é de 340.392,62 euros e que conta co financiamento da Deputación da Coruña mediante o Plan Único (POS+2021).