Concello, Cáritas e centros de ensino organizan en Boiro unha andaina solidaria para recadar alimentos

O Concello de Boiro, Cáritas e os centros de ensino do municipio organizan unha actividade de fin de curso consistente nunha andaina solidaria para recadar alimentos. A concelleira de Educación, María Outeiral, participou este 8 de xuño na presentación. Fíxoo acompañada de Lupe Tubío, coordinadora local de Cáritas, e Francisco Alonso, director do CEIP Abanqueiro, e Lucia Abad, directora do CEIP Santa María do Castro, como representantes dos centros docentes. Segundo confirmaron, a actividade terá a saída o 18 de xuño ás 10.00 horas da Estivada, en Escarabote, e percorrerá o treito do Camiño A Orixe ata a praza de Galicia.

“O obxectivo desta actividade é que as familias do municipio participen nunha xornada de convivencia e coñezan o tramo do camiño que pasa por Boiro cun obxectivo solidario”, afirmou a concelleira de Educación, María Outeiral.

O percorrido é duns 4 quilómetros e, as familias que así do desexen poderán facer unicamente unha parte do percorrido para que “poidan participar os nenos e nenas de calquera idade”. O que se busca, sinalouse na presentación, “é transmitir aos nenos e nenas a importancia de axudar a aquelas persoas con menos recursos e desfrutar do noso entorno cun obxectivo social”.

A coordinadora de Cáritas lembrou que a organización presta neste momento axuda a 25 familias do municipio polo que “calquera achega que as familias realicen é benvida para prestar ás familias a axuda que precisen para atender as demandas e necesidades destas familias”, dixo.

A entidade traballa de xeito coordinado cos Servizos Sociais do Concello e Cruz Vermella para atender as derivacións de familias vulnerábeis.

A preinscrición para participar abrirá o vindeiro luns día 13 de xuño e poderanse facer cubrindo o formulario online dispoñíbel na web municipal, www.boiro.gal.