Este martes 7 de xuño ponse en marcha en Porto do Son, da man do Concello, a Rede Eusumo – Economía Social de Galicia e Espazocoop Unión de Cooperativas Galegas, unha nova acción formativa gratuíta sobre as vantaxes e posibilidades que pon en xogo a metodoloxía de emprender en cooperativa. Trátase do curso de balde Lánzate a emprender en cooperativa, que se desenvolve dende este martes até o venres 10 de xuño, en horario de 9.30 a 14.30 horas.
Será no Viveiro de Empresas de Porto do Son. O curso proporcionará ás persoas asistentes puntos para o baremo do marisqueo a pé (PERMEX). A actividade vai especialmente destinada a persoas interesadas no emprendemento cooperativo, socias e persoal de cooperativas e público en xeral. Os obxectivos son “achegar o modelo cooperativo á cidadanía, en especial ás persoas desempregadas”, “mostrar as condicións e pasos a dar para emprender baixo a fórmula cooperativa”, “valorar as cooperativas e as súas contribucións sociais e económicas” e “coñecer a experiencia real dunha cooperativa en funcionamento”.
