Celanova despide a mostra sobre a vertente grafista de Castelao con éxito de visitas

Celanova despediu esta semana a exposición Castelao Grafista (Facsímil), que estivo desde o 6 de maio na Casa dos Poetas cuns resultados excelentes a nivel de visitas: 1.163 persoas. Segundo informa a dirección deste centro cultural, o mes de maio foi o de máis afluencia de visitantes escolares. Da devandita cifra, 900 visitantes foron alumnas e alumnos chegados dende distintos puntos de Galicia e repartidos en 20 centros escolares.

Visita á mostra de alumnas do IES Celanova Celso Emilio Ferreiro

A mostra foi un proxecto para dar a coñecer e difundir a obra e o pensamento do político e artista rianxeiro nos cinco continentes.

Grazas a esta mostra, engaden dende a Casa dos Poetas, foi posíbel realizar unha acollida de alimentos xa que, aínda que a entrada era de balde, esta exposición enmarcábase no programa Cultura por Alimentos, unha iniciativa de AFundación a favor de FESBAL (Federación Española de Bancos de Alimentos), posibilitando que no acceso á exposición se puidera facer entrega dalgún alimento non perecedoiro, que será destinado ao dispensario de produtos local. Finalmente foron recollidos uns 132 vultos (tarros, paquetes, bricks…).