A Pobra prepárase para o cuadrangular comarcal de pádel

Os seareiros do pádel teñen unha cita obrigada os días 9 e 10 de xullo na Pobra. Estamos a falar do cuadrangular comarcal no cal catro equipos que representan os concellos de Barbanza Arousa buscarán alzarse coa vitoria nunha competición que se disputará nas instalacións de Máisquepadel. Esta entidade, organizadora do evento en colaboración coa Concellaría dos Deportes da Pobra do Caramiñal, deu a coñecer este mércores 8 de xuño os detalles da cita. Participaron a edil dos Deportes, Genoveva Hermo (Nós Pobra); a técnica municipal desta área, Ana Romero; e Andrés Domínguez, en representación do organismo impulsor.

Cada equipo constará de dez persoas xogadoras seleccionadas polo capitán representante de cada municipio: A Pobra (Manel Vilasó Santamaría), Ribeira (Sergio Pérez Pérez), Boiro (Guillermo Romero) e Rianxo (Francisco Lorenzo Lorenzo). O formato que se vai seguir será o de xogos rápidos e cada enfrontamento entre concellos resolverase en cinco partidos.

A xornada do sábado 9 arrancará co primeiro partido a partir das 10.00 horas, mentres que o segundo será dende as 17.00 horas. A final disputarase no domingo 10, das 10.00 horas en diante, do cal sairá o gañador, a quen se lle entregarán dez trofeos, un por xogador/a do equipo.