A illa de Sálvora é a inspiradora do concerto que a Orquestra Sons vai ofrecer o vindeiro
sábado 9 de xullo na praza do Concello de Ribeira: un espectáculo que foi presentado esta mañá pola concelleira de Cultura María Sampedro e por dous integrantes do grupo: o seu director Álex Millet
e tamén Alba Millet.
A obra levo por título “Memorias dunha illa” e é unha creación instrumental de aproximadamente vinte minutos composta polo propio Álex Millet, quen explicou que detrás hai un traballo de seis meses.
As lendas en torno á Sálvora, anacos da súa historia como o afundimento do vapor Santa Isabel ou enclaves como o faro ou a aldea da illa son algúns dos temas que transpira a peza.
Ademais, o concerto incluirá outro repertorio: dende temas clásicos da música galega de Los Tamara ou Andrés do Barrio, ata outra creación do propio Álex Millet que leva por título “O que o tempo non
puido borrar” e está inspirado na cultura celta.
O concerto dará comezo ás 22 horas. Ademais dos intérpretes habituais da Orquestra Sons contará con outros músicos convidados ata sumar un total de 23 participantes.
Tanto María Sampedro como Álex e Alba Millet animaron á veciñanza a desfrutar do concerto.
