A iniciativa Mar Diverso da Asociación Ambar, festival de arte inclusiva e patrimonio costeiro, contará na súa vindeiro edición coa participación activa de Mar Ramón Soriano, artista plástica e ceramista de Ourense. Mar formará parte do sobranceiro elenco de artistas que dirixirá as rendas do certame. O festival celebrarase do 22 ó 31 de xullo na contorna da ría e Arousa: Cambados, Illa de Arousa, Boiro, Rianxo, Ribeira e A Pobra do Caramiñal.
Nestes momentos está traballando co grupo de artesás e artesáns de Ambar formado por Manuel A. Brión, Manuel Vilas, José M. Matías, Victoria Piñeiro, Raquel Hernández, Rubén Gómez, Suso Santamaría e Ramón Hector, que impulsan no seu día a día a área de produtos solidarios de Ambar.
A peza plástica fala “do patrimonio costeiro empregando unha disciplina que ten moita tradición en Galiza como é a cerámica. As cores azuis, sobre todo o azul cobalto forman parte do universo da cerámica de Sargadelos”, como indicou Mar Ramón.
Mar Ramón (Ourense, 1993) é unha artista plástica que se enmarca no ámbito da escultura cerámica, comeza a súa traxectoria mentres estuda o grao de Belas Artes. Tralo grao realizou un máster e doutorado en creación e investigación. No mesmo tempo produce obra plástica que se expón de forma individual e colectiva en diversos espazos de Galicia como o Marco, o CGAC, o Auditorio de Galicia ou o MACUF.
O vínculo coa galería Nordés permítelle expor na edición de Arco de 2021. Grazas a diferentes residencias artísticas traballa en lugares como Arraiolos (Portugal), Altea ou Córdoba. No 2022 consegue o título de doutora grazas a unha investigación sobre o xénero como variable procesual nas obras de arte que teñen os obxectos coma protagonistas.
A peza plástica que se está elaborando quere “representar a forza da comunidade creada a partir de pequenas pezas. Cada persoa traballa en pequenas expresións da súa identidade plástica, nótase como os participantes teñen unha personalidade moi marcada á hora de traballar, pero o obxectivo e a esencia está no conxunto unitario”, sinala a propia artista.
Sobre Mar Diverso
Segundo informa Ambar, Mar Diverso mestura artes plásticas, escénicas e artesanía e ten como obxectivo “poñer en valor o patrimonio e a cultura tradicional mariñeira de maneira inclusiva a través da creación artística de persoas con diversidade funcional e profesionais do eido artístico”.
Ambar leva 40 anos traballando polos dereitos das persoas con diversidade funcional, promovendo a súa autonomía, independencia e igualdade de oportunidades. A área de Artes naceu co obxectivo de apoderar as persoas con diversidade funcional a través da expresión artística, realizando accións na comunidade cunha temática de interese social.
Mar Diverso enmárcase nesta filosofía da entidade. É un festival de artes escénicas e plásticas inclusivo que pon en valor o patrimonio mariñeiro a través de accións artísticas de persoas con diversidade funcional dentro da contorna costeira da ría de Arousa, “vinculando así creación, inclusión e territorio”.
