O Concello de Boiro e a agrupación local da Cruz Vermella organizaron unha saída a Santiago de Compostela na que participou un número moi relevante de persoas maiores do termo municipal. A actividade abeirouse ao programa Boirenses viaxeiros. A primeira viaxe foi precisamente unha andaina a Compostela, á que, amais dos maiores de Boiro, tamén se sumou o concelleiro de Servizos Sociais, Raúl Treus.
Preto de 100 persoas participantes nos obradoiros de memoria e outras actividades que desenvolve a Cruz Vermella en Boiro participaron nesta primeira actividade de Boirenses viaxeiros. A andaina levounos dende o Monte do Gozo ata o centro da cidade de Compostela, onde realizaron unha visita guiada.
O alcalde, José Ramón Romero, despediu aos asistentes en Boiro, que saíron en autobús para Santiago de Compostela e alí foron recibidos polo concelleiro de Servizos Sociais, quen afirmou que “tralo éxito desta primeira edición temos interese en continuar por esta liña e seguir favorecendo actividades de ocio para os nosos maiores”. O alcalde, José Ramón Romero, agradeceu a implicación de Cruz Vermella cos maiores do municipio: “Cada vez son máis as persoas de todas as parroquias as que participan nestas actividades, é fundamental para nós favorecer os servizos tamén no rural”, sinalou.
Esta primeira saída, que contou cunha andaina, visita polo cento da cidade é visita á Cidade da Cultura, tivo como obxectivo ofrecer aos maiores de todas as parroquias do municipio alternativas de ocio e tempo libre para manter a súa actividade.
