O Grupo Municipal Socialista vén de votar en contra da proposta de orzamentos presentada polo Goberno municipal no pleno do mes de maio celebrado o pasado xoves. Nun comunicado no que explica a súa postura, o grupo di “valorar negativamente os orzamentos por non avanzar nas prioridades consideramos fundamentais para a vila”.
Segundo engadiu o voceiro Roberto Iglesias na súa intervención no pleno, “a prioridade fundamental do Executivo municipal debera ser o saneamento da ría, e máis tras coñecer unha vez máis os malos resultados que prohiben o baño na praia de Testal, polo que nos posicionamos en contra dunha proposta que recorta o gasto na mellora de saneamento”.
Os socialistas indican que “logo de 6 anos de Goberno bipartito PP-NOIA, e levando 3 anos do presente mandato, non se teñen materializado as obras necesarias para a vila, como o centro de día, o centro de saúde ou a escola infantil pública, nin se aposta pola mellora da accesibilidade, entre outras”.
Roberto Iglesias foi moi crítico coas xestións feitas dende o Concello para atraer turistas ao municipio e manifestou que “non se fai nada pola mellora do patrimonio, nin Museo das Laudas, estando en moi mal estado Santa María A Nova e non sendo a restauración de Ponte Nafonso un modelo a seguir neste sentido”. Tamén dixo que non se aplican medidas a prol do turismo estival: “Non hai esforzos pola mellora dos accesos ás praias, e de dotación de socorristas nin falamos”.
Así mesmo lembrou que hai unha moción aprobada en pleno por maioría na que os socialistas propoñían a instalación de puntos de recarga para vehículos eléctricos.
O voceiro indicou que “tampouco se apoia ao Comercio, non poñendo en marcha os bonos solicitados en reiteradas ocasións por este grupo, malia que si se poñen en marcha outros concellos da comarca”.
A pesar de todo o devandito, os socialistas tamén salientaron os puntos positivos dos orzamentos, como son a obras previstas nas parroquias, a mellora en servizos sociais, ou o elevador na Casa da Cultura.