O Maio Cultural de Ribeira achega este ano preto dunha vintena de eventos

O Concello de Ribeira preparou dezaoito eventos para festexar as Letras Galegas, ao abeiro do tradicional Maio Cultural 2022 que regresa a Santa Uxía e ás parroquias en todo o seu esplendor. A esta listaxe de actividades únense as organizadas por asociacións veciñais nas diferentes localidades, como por exemplo en Aguiño ou en Carreira.

O poeta Florencio Delgado Gurriarán, homenaxeado este ano nas Letras Galegas

As concelleiras de Educación e Cultura, Juana Brión e María Sampedro, presentaron o calendario de citas, que comezou o domingo día 1 cun concerto para público infantil no Auditorio a cargo de Xabier Díaz e que está adscrita á Rede Galega de Dinamización Lingüística. A axenda proseguiu o día 3 con Talía Teatro e a A parábola do angazo, e o día 7 con Pakolas e o seu espectáculo musical Ramona Órbita, en Artes.

A maiores, haberá espectáculos teatrais e musicais, exposicións, contacontos ou xornadas multidisciplinares, e tamén a presentación da última novela gañadora do Concurso de Novela Curta Cidade Centenaria de Ribeira: Lúa nova, de Irene Montero, editada por Xerais. Será o 26 ás 20.30 no salón de plenos e o evento tamén incluirá a entrega de premios do XXX Concurso Escolar das Letras Galegas: unha das iniciativas educativo-culturais máis lonxevas na comarca.

A axenda terá continuidade o día 13, ás 21.00 horas no Auditorio Municipal, con Tras os vieiros de Florencio (de Fantoches Baj e para todos os públicos); o día 14 ás 19.00 horas con Barullo de Nelson Quinteiro, no Porto de Palmeira (do programa Ler Conta Moito, para todos os públicos); o día 14 ás 18.30 horas con 100 anos de cantigas, na praza da Porto do Sol (ás 18.30 horas e da man do Coro de Cantigas de Agarimos); e o día 15 co Festivaliño 2022 (cinema, teatro e música no Parque García Bayón e na Porto do Sol, a partir das 18.00 horas e para público infantil e familiar).

O Día das Letras Galegas, 17 de maio, será a quenda do contacontos ilustrado e musicado De Valdeorras a México. Terra A Nosa, de Polo Correo do Vento (ás 12h na praza do Concello); do concerto de música tradicional de Saraghallada, ás 12.30h no Parque García Bayón; e da Xornada das Letras Galegas da AFLM de Aguiño (ás 16.30h na Aula de Música de Aguiño). A maiores, a Asociación de Carreira celebra no Parque de San Roque (ás 11h) a xornada de deporte e cultura Orientación das Letras Galegas (con tres percorridos diferentes). Organizan a Asociación de Veciños de Carreira (aavvcarreira.wordpress.com) e o Concello.

O día 19 está prevista unha visita á Cidade da Cultura do alumnado do Seminario da Lingua e Literatura Galegas do Concello de Ribeira e o día 21 un espectáculo arredor de Florencio Delgado no Centro Social de Oleiros, a función Vendimando Versos, a cargo de Soledad Felloza (ás 19h).

Na xornada do 26 está prevista a presentación da novela gañadora da VIII Edición do Concurso de Novela Curta Cidade Centenaria de Ribeira (Lúa nova, de Irene Montero). Será ás 20.30 horas na Casa do Concello. O día 28 actuarán María Faltri e Jorge Juncal na Casa da Cultura de Carreira (ás 19h), co espectáculo Fantasía coas palabras (Ler Conta Moito); e na mesma xornada do 28 celebrarase no Auditorio de Ribeira o Concerto das Letras Galegas a cargo da Coral de Caldas de Reis, o Coro Santa Susana e a Coral Municipal de Ribeira (ás 20.30h). Ademais, o día 29 recalará en Aguiño Paco Nogueiras co seu espectáculo Radio Bulebule (na Aula de Música ás 18h).

A maiores, podemos visitar a mostra Emocións, de Oswaldo Guayasamín, até o 28 de maio no Centro Cultural Lustres Rivas, e máis a exposición Florencio Delgado Gurriarán. Letras Galegas 2022, até o 31 de maio na Biblioteca Municipal de Ribeira.

Inauguración da mostra de Oswaldo Guayasamín