A Pobra do Caramiñal compartiu novamente a súa axenda cultural para esta semana, marcada polo Día das Letras Galegas, con Florencio Delgado Gurriarán como protagonista neste 2022.
No propio día 17, ás 12.30 horas, terá lugar a apertura da mostra Letras Galegas 2022. Florencio Delgado Gurriarán, que se instalará nos Xardíns de Valle-Inclán, e a lectura de poemas por parte de Eiradela, ademais de animación de rúa da man dos grupos de música tradicional Caraveiros, Trécola e Xiada.
Xa no 18 de maio, Día Internacional dos Museos, estrearase no Museo Valle-Inclán a exhibición dos carteis das Xornadas de Homenaxe a Valle-Inclán ó longo dos seus vinte e tres anos de traxectoria.
A narración oral caracterizará o día 19 cun novo contacontos, O eco das pedras, a cargo de Raquel Queizás, na biblioteca municipal Victoriano García Martí, ás 18.00 horas.
Doutra banda, o Auditorio do Museo Valle-Inclán acollerá no día 20, ás 20.30 horas, a entrega do IV Premio de Literatura Infantil Carlos Mosteiro e a presentación da obra gañadora desta edición: Por mor de cinco pizzas ós catro queixos, de Xosé Antonio Neira Cruz. As persoas asistentes recibirán como agasallo un exemplar do libro.
Finalmente, un céntrico espazo da localidade como é o Cantón da Leña acollerá no 21 de maio, ás 12.30 horas, a Primavera das Letras da Real Academia Galega, que consistirá no obradoiro Coloreando con Florencio e no contacontos Son o poeta que cruzou o océano, con texto de Ledicia Costa e ilustración de Blanca Millán. Xa pola tarde, realizarase o concerto da coral Abrente Cantos de aquí e acolá. Será ofrecido pola Asociación de Amas de Casa, a partir das 20.00 horas, no teatro cine Elma.
A entrada é libre ata completa-la cabida. Todas estas citas adscríbense á programación do Maio das Letras que organiza a Concellaría da Cultura, da cal é titular Patricia Lojo (PSdeG-PSOE).
